Yangiliklar
Qizamiq kasalligining oldini olish bo‘yicha tavsiyalar
Qizamiq kasalligining oldini olish bo‘yicha tavsiyalar
Qizamiq nima?
Qizamiq — virus sababli yuzaga keladigan, havo-tomchi yo‘li orqali yuqadigan juda yuqumli kasallikdir. Kasallik yo‘talish, aksirish yoki bemor bilan yaqin muloqot qilish orqali tez tarqaladi. Ayniqsa emlanmagan bolalar va immuniteti past odamlarda og‘ir asoratlar rivojlanishi mumkin.
Qizamiqning oldini olish yo‘llari
1. O‘z vaqtida emlash
Qizamiqdan himoyalanishning eng samarali usuli — emlashdir. Mutaxassislar qizamiqqa qarshi vaksinaning ikki dozada qabul qilinishini tavsiya etadilar. To‘liq emlangan insonlarda kasallikdan ishonchli himoya shakllanadi.
2. Kasal odam bilan aloqani cheklash
Qizamiq aniqlangan bemor bilan yaqin muloqotdan saqlanish zarur. Kasallik alomatlari bo‘lgan shaxslar imkon qadar uyda qolishi va boshqalardan vaqtincha ajratilishi tavsiya etiladi.
3. Shaxsiy gigiyenaga rioya qilish
- Qo‘llarni tez-tez sovun bilan yuvish.
- Yo‘tal yoki aksirishda og‘iz va burunni salfetka yoki tirsak bukilishi bilan berkitish.
- Xonalarni muntazam shamollatish va tozalash.
4. Immunitetni mustahkamlash
Sog‘lom ovqatlanish, yetarli uyqu, jismoniy faollik hamda shifokor tavsiyalariga amal qilish organizmning infeksiyalarga qarshi kurashish qobiliyatini qo‘llab-quvvatlaydi.
5. Kasallik belgilari paydo bo‘lsa, shifokorga murojaat qilish
Qizamiqning dastlabki belgilari:
- yuqori tana harorati;
- yo‘tal;
- burun oqishi;
- ko‘zlarning qizarishi va yoshlanishi;
- keyinchalik yuzdan boshlanib butun tanaga tarqaladigan toshma.
Ushbu belgilar kuzatilganda, o‘zini o‘zi davolamasdan tibbiy muassasaga murojaat qilish zarur.
Muhim eslatma
Qizamiqning oldini olishda eng muhim chora — milliy emlash taqvimiga muvofiq emlanishdir. Ota-onalar farzandlarining barcha rejalashtirilgan emlashlarini o‘z vaqtida olishini ta'minlashlari, kattalar esa emlash holati noma'lum bo‘lsa, tibbiyot xodimi bilan maslahatlashishlari tavsiya etiladi. Emlash nafaqat shaxsni, balki jamiyatni ham kasallik tarqalishidan himoya qiladi.
Sanepidqo'mita Jizzax viloyat boshqarmasi Axborot xizmati
So’ngi yangiliklar